نسمات مسائيه (مفهوم الجنس عند العرب)

 

"حاسس إن في شيء مخيف معايا في الاوضة.. ومع ذلك لا عارف أصرخ ولا عارف اتحرك!"  🥷

📍 الجاثوم

لو عمرك ما خضت تجربة الجاثوم قبل كده خليني اوصف لك الشعور بالضبط:

تخيل معايا إنك صحيت فجأة.. عقلك واعي وحاسس بكل اللي حواليك، بس مش عارفة تحرك أي حاجة في جسمك.

أحيانًا ممكن تعرف تفتح عينيك وأحيانًا لأ... واللي بيزود رعبك إنك بتكون متأكد ١٠٠٪ إن في "حاجة" معاك في الاوضة بتقرب منك.

بتحاول تهدي نفسك بس مش عارف، حاسس كإن في حاجة تقيلة موجودة فوقك منعاك تتنفس. ضربات قلبك بتزيد جدًا ووشك بيحمر. بتحاول تذكر ربنا بصوت عالي بس مفيش صوت بيطلع... ده انت حتى مش عارف تصرخ عشان حد ييجي يلحقك!

ممكن تسمع أصوات غريبة.. وتشوف ظلال بتتحرك في الاوضة. وأوقات ممكن تشوف هلاوس بصرية زي إن في شخص بيهجم عليك، أو إن في ست عجوزة بتحاول تخنقك! 

شعور مرعب.. بس تفتكر ده فعلًا "جن النوم" زي ما بيقولوا؟

الجاثوم ليه أساطير كتير جدًا في أغلب الحضارات.. وكالعادة كل حضارة بتضيف تفاصيل مختلفة للحكاية وبتطلق عليها اسم مختلف. 

زي مثلا ما في المكسيك شايفين إن دي أرواح الموتى وجت عشان تسيطر على أرواح الأحياء، وفي أماكن تانية زي فيتنام شايفين إنه الجاثوم عبارة عن روح شريرة بتدخل جوا الإنسان عشان كده بيتشل مؤقتًا. 

وفي بريطانيا كانوا شايفين الجاثوم ست عجوزة - اسمها Old Hag- شكلها مخيف بتحاول تخنقك.

بس خلينا نرجع تاني لسؤالنا.. هو الجاثوم ده "جن النوم" بجد ؟ 

الإجابة لأ : ) 

الجاثوم أو Sleep paralysis بيعتبر اضطراب من اضطرابات النوم، واللي بيتعرض له ٤ من كل ١٠ أشخاص، وفي منه نوعين :

١. النوع اللي بيحصل وانت بتبدأ تدخل في النوم (predormital sleep paralysis)

٢. النوع اللي بيحصل بمجرد ما تصحى (postdormital sleep paralysis)

الحكاية بإختصار إننا بنمر بأربع مراحل خلال النوم، وفي مرحلة ال REM (Rapid eye movement) بنبدأ نحلم.

ف لو بصيت على حد وهو في المرحلة دي هتلاحظ إن عينيه بترمش كإنه بيحاول يشوف حاجة.

تخيل معايا إنك بتحلم إنك بتجري في غابة مثلًا.. ف عشان متقومش تجري بجد في الاوضة عقلك بيفرز حاجة اسمها Acetylcholine في العمود الفقري عشان يشل حركتك ويحميك من إنك تقوم تنفذ اللي في الحلم.

ولما الحلم ينتهي وتبدأ ترجع لوعيك المفروض تأثير ال Acetylcholine يبدأ يروح.. لكن ده مش بيحصل دايمًا.

عقلك بيكون صاحي وواعي للي بيحصل حواليه.. بس جسمك لسه موصلتلوش رسالة من المخ إنك صحيت. الموضوع غالبًا بيستمر لثواني لكن عقلك بيحسسك إنها فترة أطول بكتير. 

طب عارف ليه ممكن تسمع أصوات غريبة؟ الأجزاء الداخلية من الودن بيحصل فيها اهتزازات خلال الفترة دي فبتبدأ تسمع صوت فيه زن. 

وطبعًا مش محتاج اقول لك إنك كل ما هتقاوم كل ما الموضوع هيزيد.. وده لإنك هتخاف فهيتفرز كميات كبيرة من الادرينالين.

 لو عايز تتجنب الجاثوم أو شلل النوم حاول تظبط شوية حاجات في نظام حياتك، زي إنك تحاول تنام عدد ساعات كافي ما بين ٦-٨ ساعات، إنك تقلل كمية المنبهات اللي بتاخدها، تقلل شوية التوتر والإجهاد البدني، وإنك متفضلش نايم على ظهرك فترة طويلة. 

كمان المرة الجاية لما تيجي تنام حاول تذكر ربنا عشان تسترخي وتطمن نفسك، ونام على جنبك اليمين وكله هيبقي تمام ❤️

+ متنساش تحكيلنا.. حصل لك موضوع الجاثوم ده قبل كده؟ 

وفي مقال جاي هيوضح كل حاجه عن الجاثوم بالتفصيل 👌